من أمهات لبتيت

يسم الله الرحمن الرحيم وصلى الله على أشرف الأنبياء والمرسلين

وبعد فقد اخترت لكم أمثلة من أمهات لبتيت لكل من :محمد ولد هدار ،وسيدي محمد ولد الكصري ،وامحمد ولد أحمد يوره، والكفيَه ولد بوسيف.

1- محمد ولد هدار:

سُبْحان الله ألَّ تبَّاعْ == إگليدْ أُ حُكْمْ إگليدْ

اتلَ فيهمْ ما لاهِ گاعْ == تورَ خَيْمه لوْلادْ احْمَيدْ

دارْ التبّاعْ أَلاّ ظليْتْ == نسَّدَّرْ فيهَ واتمَشيْتْ

عَنْهَ واعْگَبْتْ الهَ وليْتْ == عارفْ عَنْ ذَ ماهُ مُفيدْ

غَيرْ أَلاّ باطلْ ذاكْ اتليْتْ == الِّ باگيلِ عتْ افْلَيْدْ

توْحِيدِ بالرّبْ القهّار == أُفاتْ أخبارُ منْ لخْبَارْ

ما ينْزادْ أُورَ شَوْفتْ دارْ == اليومْ اف تُبّاعْ إگلِيدْ

أُ دارْ اخْرَ بانْبَيْكتْ لحْمارْ == كافِينِ ذاكْ امْنْ التوحِيدْ

وله أيضا:

حَحْ أصْلْ آنَ بَعْدْ أَعَدَّلْ == عَنْدِ وَ مَوْنَكْ وَ جَمَّلْ

فيَّ منْ شَوْفْ احْسَيْ الظلْ == إجِينِ ف افْريگْ انْچرْمَيل

اللّيْلْ أُ نَرْكَبْ فَوْگْ اجْمَلْ == وانْج لبْلمْعارظْ فاللّيْلْ

ومن إنتاجه:

ازْعَمْ ي عَگْلِ مانكْ گَاعْ == لاِه منْ دَوَامْ التّلْيَاعْ

اتْخُوظْ اعْلَ دَارْ امْنْ انْواعْ == ادْيارَاتْ احْزيمَكْ لكْبَارْ

الِّ ف الْگبْلَ تيگطَّاعْ == ما مَشّيْتْ الدّمْعْ ابْلكْثارْ

صَوَّنْ گاعْ الدَّمْعْ أُ خَلِّيهْ == يَ عَگْلِ تَرْجَعْ تفْصلْ فِيهْ

ويلَ عَادْ ألاَّ فَرْظْ اعْلِيهْ == الْمَشْيْ اعْلَ دارْ افْلَوْكارْ

الْغيظْ اعْلَ دارْ إمَشِّيهْ == منْ كِيفنْ عَادْ اعْليهْ الْعَارْ

رَاعِ هاذَ ولْ انْدكَّاكْ == أُ ذاكْ الْفُرْعْ أُ ذاكْ انْچلاَّرْ

ذاكْ افْطَنْ عَنْدُ دَارْ أُ ذَاكْ == عَنْدُ دارْ أُ ذَ عَنْدُ دارْ

كما أن له:

مَبْعَدْ لحْدَيْبْ أُ تنْضلِّينْ == منْ دارَ واكْراعْ اگْوابِين

أُ منْ لكْويرْ أُ منْ توجُنِينْ == ذُوكْ الدُّونِيِّينْ الصَّ غَيرْ

مَحَدّنْ مَرْكُوبْ أُ لعْوينْ == يَنْجَبْرُ ما كانْ أَلاَّ خَيرْ

2- سيدي محمد ولد الكصري:

حَدْ أَصِيلْ افْتَگَانتْ شَامْ == نافدْهَ لاگِ عَنْهَ عَامْ

واعْمَلْ ب الْيَالِيهْ أُ لَيَّامْ == لَيْنْ الْحَگْ منْهَ بَلْ امْنَيْنْ

عَادُ ايْبَانُولُ رُوصْ افَّامْ == اطْرگْ تَگَانتْ متْحَدِّينْ

فالْغَبْيْ اعْلِيهمْ هَاكْ اغْمَامْ == هُومَ زَادْ ألَّ مَشْيُوفِينْ

مَزَالُ فالْغَبْيْ أُ لغْمَامْ == يَنْبَاوْ أُ يَغْبَاوْ امْسَاكِينْ

مَا يَبْگ شَوْقْ ادْرَسْ مَا گَامْ == أُ لاَ يَبْگ ف الْعَيْنِينْ اخْزِينْ

أُ لاَ يَبْگ مَنْظُومْ افْلكْلامْ == مَا جَاوْ الْفَاظُ مَنْظُومِينْ

أُ يَبْگ مَا وَدَّ حَقْ اتْرَابْ == مَاهِ كِيفْ اتْرَابْ اخْرَ زَيْنْ

أُ لا حَقْ امَّلِّ زَادْ احْبَابْ == مَا ينْجَبْرُ فَ ابْلادْ اخْرَيْنْ.

وله:

يامسْ دَارْ إِبلْغَانْ احْيَاتْ == ذاكْ الِّ شَكَّيْتْ انُّ مَاتْ

اگْبَلْ منْ تلْيَاعِ وامْحَاتْ == منْ لخْلاگْ الِّ خَاطِيهَ

اتْلَفَّتْ اعْلِيهَ مرَّاتْ == كِيفْ الِّ نَاسِ شِ فِيهَ

واعْگَبْتْ امْنَيْنْ ابْعِيدْ ابْگَاتْ == وابْگَيْتْ اتْلَفَّتْ اعْلِيهَ

تلْفِيتَ منِّ مَا خَلاَّتْ == فَظْلَ لاهِ نَكْرَهْ بِيهَ

وللَّ نبْغِ ذَ الِّ مَوْجُودْ == اتْلَ ف الدّنْيَ رَاعِيهَ

مَاهْ اتْلَ خَالگْ لَيْنْ انْعُودْ == نَكْرَهَّ وللَّ نبْغِيهَ

وله:

نَعْرَفْ بُنَايَ كَانتَ هُونْ == دَهْرْ ابْعِيدْ أُ منْ هُونْ أُ دُونْ

الَّ عَادتْ بَاطْ اجْدرْ بُونْ == أُ عَگْبتْ عَادتْ تنْبُصْكَايَ

عَاگبْ ذَاكْ أُ فَرغتْ يَكُونْ == اعْرَيْشْ أُ نبْتتْ صدْرَايَ

مَاهِ بُنَايَ فَمْ الله == يگْطَعْ بالدَنْيَ خَلاّيَ

مَعْوَدْ لامتْهَ والتّنْزَاهْ == اعْگُوبتْهُمْ رَدْ ارْوَايَ

وله:

كَالْحَمْدْ الِّ يَ وَادْ == لمْرَيْفگْ واكْتنْ رَادْ

الله اعْلِيكْ ابْعَادْ == الدَّهْرْ الِّ غَلاكْ

خسْرتْ حَالتْ لَبْلادْ == أُ عدْتْ انْتَ للِّ جَاكْ

مَاهْ انْتَ ذَاكْ أُ عَادْ == ذَ مَاهُ دَهْرْ اغْلاكْ

أُ عدْتْ آنَ مَانِ زَادْ == سِيدِ مُحَمَّدْ ذَاكْ.

3- امحمد ولد أحمد يوره:

لمْتَيّنْ منْ علْبُ لژْرگْ == حَدْ اعْلَ فُمُّ گَظْ أُ كَظْ

اعْلَ تنْتَگْظَظْ ما يَلْحَگْ == حَدْ افْطنْ عَنْ ذاكْ إِوَعَّظْ

لمْتَيّنْ حَدْ إِگُولْ اگْبَالْ == عَنُّ كِيفُ حَاسِ مُحَالْ

كِيفُ تنْتَگْظَظْ ف التّعْدالْ == ما نَللَّ ماهِ كونْ أَگَظْ

عتْ اتْكَذّبْ منْ فَمْ اگْبالْ == عاگبْ ذاكْ افْذاك أُ تَغْمَظْ

أصْلْ اتْروحْ انْتَ ي الدّلاّلْ == ل الجَّنَّه مَرْوَحْ بَعْدْ أبْيَظْ

وله:

كَيَّمْلِ مَشْرَكْ وادْوَيْرَاتْ == البولْ ابْلَيْعَاتْ امْتاناتْ

والعلْبْ ألِّ فِيهْ التَّمَاتْ == ذاكْ ألِّ لَرْباطْ افْبَاطُ

هُوَّ گَاعْ امْتَنْهَ لَيْعَاتْ == ارْبَاطُ وارْبَاطْ ارْبَاطُ

وله:

لَعْلابْ الِّ كانْ المرْتابْ == اعْلِيهمْ منْ عَادتْ لحْبَابْ

أعْلابْ احْسَيْ أهْلْ الْكَتّابْ == والْعلْبْ الِّ سَاحلْ فَاوَ

واعْلابْ انْواذِيبُ وَاعْلابْ == الْحَيْرشْ واعْلابْ اعْوَاوَ

وله:

كلْتْ انّكْ منْ عَنْدْ ابْلعْكَاكْ == كُونْ اتْجَوْلِ حَگَارَه هَاكَ

واكْرَاعْ انْکَيْگَمْ بِيكْ أَيَّاكْ == تسْلكْ منْهمْ هُومَ يَ الْبَالْ

وارْبگْ فالْ أُ ذَ مَانِ شاكْ == عَنُّ يگْدرْ يخْلگْ وَ اشْگَالْ

تَحْگَرْنِ حَگَارَ لَذَاكْ == واكْرَاعْ انْگَيْگَمْ وارْبگْ فالْ

وله:

لبْحَيْرْ الِّ كَانُ لكْويْرْ == عَنْدُ خَيْبَارَ عَادْ الْخَيرْ

سبحان الله ألَّ لبْحَيْرْ == الْواخظْ گبْلتْ سَدْ أُ سَدْ

وَبَرَّازْ أُ طَنكْ النّپَّيْرْ == اتْلَ ما خَاطرْ فِيهمْ حَدْ

ذَ ظَرْكْ الْمَوْطَنْ منْ لَوْطانْ == عَوْدانُ يَ الْواحدْ لَحَدْ

ما عَنْدُ حَدْ أُ هُوَّ كانْ == ما يَخْلَ منْ حَدْ اتْوَحَّدْ

وله:

ابْنصّكْ وللَّ گَاعْ انْزيدْ == امْشَ تشْوَاشْ ازْمَانْ ابْعِيدْ

وانْتَ گَايلْ عَنّكْ مُفِيدْ == يَمْ التّشْوَاشْ اعْلِيكْ الْيَاشْ

هاذَ هُوَّ مَوْگَفْ "تَوْحِيدْ == اللَّگّاطْ" أُ "عذْرْ النواشْ"

واثْرَكْ لا جَيْتْ ال تنْپزَيْدْ == منْ جِيهة لُوَّيْدْ الِّ خَاشْ

ف الْوَادْ امْنْ امْگَابلْ لغْرَيْدْ == ما يَبْگالِ منّكْ مُنْگَاشْ.

وله:

اشْمَشَّانَ واشْگَعَّدْنَ == آنَ وانْتَ هُونْ أُحَدْنَ

يَ الْعَگلْ اعْلَ دَارْ افْ مدْنَ == گبْلتْ سَاحلْ وَادْ احْنَيْنَ

شَيْنَ كَانْ اگْعَدْنَ ضعْنَ == أُ عَنْهَ كَانْ امْشَيْنَ شَيْنَ

ما فتْنَ لَيْنْ احْنَ لَثْنَيْنْ == ف الدَّارْ ابْكَيْنَ واشْكَيْنَ

واتْمَثْنَيْنَ ف الدَّارْ إِلَيْنْ == منْ حَقْ الدّارْ اتْنَجَّيْنَ.

4- الكفيه ولد بوسيف:

يَ الْعَگْلْ اگْدمْ نَافدْ لُبَّيْرْ == يَكَانكْ لَسْقَامْ إِهَنُّوكْ

أَلاَّ حَاسِيكْ أُ فِيهْ الْخَيْرْ == مَبْرُوكْ أُ عَنْدُ منْتْ ابْرُوكْ

مصَّابْ الْمَبْدُوعْ أُ رَدَّامْ == علْبْ النّصْ أُ زِيرتْ لغْمَامْ

هُومَ وانْوَاتِيلْ أَنَجَّامْ == واغْنَكَّسْ وابّيْرَاتْ الشَّوْكْ

مَا فِيهُمْ وَاحدْ فِيهْ اخْيَامْ == مَا عَادتْ فِيهمْ منْتْ ابْرُوكْ

مصَّابْ أُوكْ أُ ظَايتْ لگْنَدْ == واحْرَاگفْ لَبْيَارْ أُ لمْلَدْ

واعْلاَبْ الْحَاسِ والْمَحْرَدْ == يَ مصَّابْ امَّلِّ هَاذُوكْ

مَا فِيهمْ واحدْ عَنْدُ حَدْ == ما عَادتْ فِيهمْ منْتْ ابْرُوكْ

منشورة في: الشعر الحســاني